"Darating si Prinsipe Bahaghari sa yugtong natabunan ng abo ang mundo ng Kuwentista. Nagalit at sumabog ang bulkan, at bigla-bigla'y natabunan ang lahat ng bakas ng kaunlaran. Nahinto ang pagiging matanda ng Kuwentista habang nagpapakilala sa kaniya ang prinsipeng bisita. Hindi man agad-agad na naniwala, nakisakay at nakisabay ang Kuwentista sa salaysay ng paglalakbay ng prinsipeng kaibigan. Ang planetang pinagmulan, ang mga haring may mga nalihis na tanaw tungkol sa katandaang-gulang, ang mga nilalang na nagkakaroon ng espesyal na kahulugan dahil sa pagsintang inilalaan, ang bahagharing kulay ng pamamaalam at paglisan. Ang pag-alala ng Kuwentista sa nangyaring bahaginan ay paulit-ulit na paalala sa sarili at sa lahat tungkol sa iba't ibang papel na dapat nating gampanan, bagama't ang mga papel na ito ay hindi palaging sumusunod sa kung ano ang nakagisnan."-- Cover